హైదరాబాద్‌: టీవీ సీరియల్ నటిని ప్రేమ, పెళ్లి పేరుతో వేధించిన ఫణితేజ అనే యువకుడిని జూబ్లీహిల్స్ పోలీసులు అరెస్ట్ చేశారు. పశ్చిమ గోదావరి జిల్లాకు చెందిన 29 ఏళ్ల మహిళ యూసుఫ్‌గూడలో తన పిల్లలతో నివాసముంటోంది. గత ఏడాది సెప్టెంబర్‌లో ఓ సీరియల్ షూటింగ్ సమయంలో నిందితుడితో ఆమెకు పరిచయం ఏర్పడింది.
ఫణితేజ రెండు నెలల క్రితం ఆమెకు పెళ్లి చేసుకుంటానని చెప్పగా, ఆమె తనకు ఇప్పటికే పెళ్లైందని, ఇద్దరు పిల్లలు ఉన్నారని చెప్పి నిరాకరించింది. ఈ విషయం తెలుసుకున్న ఫణితేజ ఆమెను ప్రేమ, పెళ్లి పేరుతో వేధించడం ప్రారంభించాడు. అసభ్యకర సందేశాలు, వీడియోలు పంపుతూ, ఆమె అత్తింటి చిరునామా తెలుసుకొని అక్కడకెళ్లి చెడు వ్యాఖ్యలు చేయడం వంటి పనులు చేశాడు.
వేధింపులు భరించలేక బాధితురాలు జూబ్లీహిల్స్ పోలీసులకు ఫిర్యాదు చేశారు. ఫిర్యాదు విషయం తెలిసిన నిందితుడు ఆమెకు సెల్ఫీ వీడియో పంపి, తన వల్లే ఇదంతా జరిగిందని పేర్కొన్నాడు. ఆమె ఫిర్యాదు ఆధారంగా పోలీసులు అతనిని అరెస్ట్ చేసి రిమాండ్‌కు తరలించారు.
