తెలంగాణ ముఖ్యమంత్రి రేవంత్ రెడ్డి దావోస్ పర్యటనలో చేసిన వ్యాఖ్యలు తెలంగాణ రాష్ట్ర పరువును దిగజార్చాయంటూ బీఆర్ఎస్ నేత దాసోజు శ్రవణ్ మండిపడ్డారు. దావోస్‌లో పెట్టుబడుల కోసమంటూ వెళ్లిన రేవంత్ రెడ్డి చేసిన వ్యాఖ్యలపై దాసోజు శ్రవణ్ విమర్శలు గుప్పించారు.
రేవంత్ రెడ్డి ప్రస్తావించిన విషయాలు ఎవరికీ అర్థం కాకుండా, తెలంగాణ ప్రతిష్ఠను దిగ‌జార్చేలా ఉన్నాయి అంటూ శ్రవణ్ అన్నారు. సీఎం హోదాలో విదేశాల్లో పెట్టుబడులను ఆకర్షించేందుకు వెళ్లినప్పుడు, జవాబుదారీతనం ఉన్న మాటలు మాట్లాడాలని చెప్పారు. దేశ మరియు రాష్ట్ర ప్రతిష్టను అంతర్జాతీయంగా గౌరవంగా నిలిపేందుకు అధికారం వహించే ప్రతిఒక నాయకుడూ కృషి చేయాలని శ్రవణ్ పేర్కొన్నారు.
ఇతర రాష్ట్రాల్లో ప‌ని చేస్తున్న ఐటీ ఉద్యోగులను రేవంత్ రెడ్డి కించపరిచారని, ఆయన చేసిన వ్యాఖ్యలు తెలంగాణ రాష్ట్రాన్ని తక్కువ చేసేలా ఉన్నాయన్నారు. ఐటీ రంగం దేశ జీడీపీ లో పది శాతానికి పైగా ఉన్నా, రేవంత్ రెడ్డి ఫ్యూడల్ వాదనలు పెడుతూ తెలంగాణను అధోగతికి నెట్టేస్తున్నారని శ్రవణ్ ఆగ్రహం వ్యక్తం చేశారు.
ఐటీ ఉద్యోగులు, వారి కష్టంతో దేశ ప్రగతికి సహకరిస్తున్నారని శ్రవణ్ అభిప్రాయపడ్డారు. దావోస్‌లో రేవంత్ రెడ్డి చేసిన ఐటీ ఉద్యోగులపై వ్యాఖ్యలను తీవ్రంగా ఖండిస్తూ, రేవంత్ రెడ్డి వాటిని ఉపసంహరించుకోవాలని డిమాండ్ చేశారు. అలాగే, ఐటీ ఉద్యోగులకు క్షమాపణలు చెప్పాలని, ఐటీ సంస్థలు కూడా రేవంత్ రెడ్డినుంచి క్షమాపణలు కోరాలని శ్రవణ్ పేర్కొన్నారు.
రేవంత్ రెడ్డి చేసిన “చైనా ప్లస్ వన్” వ్యాఖ్యలపై శ్రవణ్ తీవ్ర అభ్యంతరం వ్యక్తం చేశారు. హైదరాబాద్ ను చైనా ప్లస్ వన్ అని పేర్కొనడం అర్థం కాని మాటలు అని విమర్శించారు. రేవంత్ రెడ్డి వెంట ఉన్న సలహాదారులు ఎవరో, ఏం సలహాలు ఇస్తున్నారో అర్థం కావడం లేదని శ్రవణ్ ఎద్దేవా చేశారు.
ఈ విధంగా రేవంత్ రెడ్డి చేసిన వ్యాఖ్యలు తెలంగాణ రాష్ట్ర పరువుకు ముప్పు కలిగిస్తున్నాయని శ్రవణ్ ఆగ్రహం వ్యక్తం చేశారు. రేవంత్ రెడ్డి మాట్లాడిన మాటలను ప్రతి వేదికపై సరిగ్గా అర్థం చేసుకోవాలని, ప్రజా ప్రాతినిధ్యం పోషించే నాయకుడు బాధ్య‌తాయుతంగా మాట్లాడాల్సిన అవసరం ఉందని పేర్కొన్నారు.
